/p. 450/ demorsos interire, ut quasi fatale videatur
homini illi, qui rabie correptus interierit. Quod
si pro ratione numeri rabidorum canum homines
interirent, non adeo pauci hoc morbo succumberent.
Sed cum tam multi evadant; et medicinae
et superstitioni et miraculo locus amplissimus
datus est». Alex. – At qui fit ut in Apulia, ubi
quis a cane obmordetur, statim, postquam
Divi Viti templum, non longe distans a celeberrima
urbe Bario, adivit, convalescat? I. C. –
Non inficior haec et maiora a Deo beneficia
Sanctum illum obtinere posse. Mirabilis
enim dicitur Deus in sanctis suis. Cum tamen
Romana Ecclesia nihil super hoc definierit,
vereor ne conficta fabella sit. Alex. – At duos
sic curatos esse mihi relatum est. I. C. – Ecclesia
illa, cum sit ad maris litus posita, verisimile est
marina aqua lavari vulnus atque ita virus eluitur,
nec non aquae metus, quo illi miseri percuti
solent, prorsus eximitur et bibendo
recte se habent. Infirmitas enim illa
in sicco consistit. Canis in rabiem agitur a fame,
atra bile, invidentia et fide, quae omnia in
illo inducunt vehementem spirituum agitationem
ac proinde siccitatem, qua sanguis
exustus atque accensus ad iram eum commovet;
hinc fit ut Sole fervido, vel caniculae ardoribus
rabiei sit obnoxius. Quam ob causam
Oceani accolas, demorsos a cane rabioso,
certatim ad mare currere vidi, Flessingiae cum
essem. Alex. – Illud est mirum, si a siccitate